- 333 -

1386. Nov. 21. Liegnitz.

Herzog, Ruprecht verkauft für sich und als Vormund seiner Brüder der Stadt Liegnitz das Dorf Henningsdorf zwischen dem Dom und dem Bruche unfern der Stadtmauer gelegen.

In gotis namen amen. Wir Ruprecht von gots gnaden . . herczog yn Slezien vnd herre czu Legnicz bekennen vffinlich vor allin den, die nv syn adir vmmir werdin, daz wir von vnser selbis wegin, vnd von der hochgebornen fursten . . herczogen Wenczslaws, Bonczslaws vnd Heinrichs vnser liebin brudere wegin, die von denselbin gots gnaden auch herczogen vnd erpherren mit vns syn czu Legnicz, der vormunde wir iczuud syn, vnser swere schaden czu vormydin vnd vnsern fromen grosslichen czu werbin mit rathe vnser getrouwin eldesten rechtlich vnd redelich vorkouft han vnd vfgelossin vnser dorph Henningesdorf, das de gelegin ist zwisschin dem thume vnd dem bruche vor Legnicz yn allin synen reyen vnd greniczen alse ez gelegen ist, mit alle synen czinsen, herscheften vnd nuczberkeiten, mit allen rechten vnd gerichten, obirsten vnd nedirsten, nichts ousczunemen, alse wir ez gehabt vnd besezsin han, mit wazsern vnd mit wegen, die dorczu gehorin, den erbern, wyesen burgermeister vnd rathmannen vnd der ganczen gemeinde vnser stath Legnicz vnsern liebin getrouwin, die iczund syn vnd allin erin nochkomlingen czu der stath hand vnd yn der stath namen czu Legnicz, vnd habin von vnser selbis vnd von der obgenanten herren vnser liebin bruder wegin daz obgenante dorph Henningesdorph mit alle synen czugehorungen, rechten, herschaften vnd nuczberkeiten, nichts ousczunemen, wie man die benennet, sie syn hiuore benant adir nicht benant, den vorbenantin vnserm getrouwin liebin burgermeistere, rathmannen der ganczin gemeinde vnser stath Legnicz, die iczund syn vnd allin den, die de vmmir noch en burgermeistere, rathmanne vnd gemeinde werdin doselbist, zu der stath Legnicz hande vnd yn erem namen gelehin, gereichit vnd gelangit erplich vnd ewiclich zu habin vnd zu besiczin, zuvorkoufin vnd zuvorgebin vnd zu geniessin vnd do mete zu tun vnd zu lossin yn allirmose, alze ez an vns komen ist vnd alze wir ez gehabt vnd besezsin han, wie en daz behagit allirbeste. Mit orkunde diz briues gegebin zu Legnicz vndir vnserm gemeinen anhangendin ingesegele, noch Crists geburde vnsers liebin herren tousund vnd dryehundirt jare ynm sechsvndachczegistin jare an sante Cecilien obande. Do bye syn gewest vnser getrouwe liebin Hannus Cranch, hoferichter czu Legnicz, Cunrad vom Spilner, Nitsche von der Ozsel, Heinrich vnd Niclas von Slewicz, Mathyes von Damyansdorph vnd er Thomas Gyethan vnser schryeber, deine wir desin brieff beuolhin.

O. d. St. L. No. 163. Das Siegel an rothseidener Schnur. — Bitschens Privilegb. f. CVIIb. — Dessen Geschossb. p. 147.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866